लग्नाआधीच भांडाफोड! ‘दक्ष वैद्य’ निघाला इक्बाल शेख; बनावट कागदपत्रांवर तरुणीशी प्रेमसंबंध 💥
नातेपुते(प्रतिनिधी )स्वतःला ‘दक्ष केशव वैद्य’ असे सांगत बनावट आधारकार्ड व पॅनकार्डच्या आधारे एका तरुणीशी प्रेमसंबंध प्रस्थापित करणाऱ्या तरुणाचा खरा चेहरा अखेर उघडकीस आला आहे.
लग्नाची तयारी सुरू असतानाच तो प्रत्यक्षात इक्बाल शेख असल्याचे समोर आल्यानंतर तरुणीच्या कुटुंबीयांना मोठा धक्का बसला.
या प्रकरणी नातेपुते पोलीस ठाणे पोलिसांनी सखोल तपास करत आरोपीला ११ मार्च रोजी अटक केली असून माळशिरस न्यायालयाने त्याला सोमवारपर्यंत पोलिस कोठडी सुनावली आहे.
मिळालेल्या माहितीनुसार, नातेपुते येथील २५ वर्षीय तरुणी पुण्यातील एका खासगी कंपनीत नोकरी करते. सप्टेंबर २०२५ च्या सुमारास तिची आरोपीशी ओळख झाली. आरोपीने स्वतःचे नाव दक्ष केशव वैद्य (रा. उंबरे, ता. राहुरी, जि. अहिल्यानगर; सध्या रा. बाणेर-पाषाण लिंक रोड, पुणे) असे सांगून तिच्याशी मैत्री वाढवली.
स्वतः हिंदू असल्याचे भासवण्यासाठी त्याने बनावट आधारकार्ड व पॅनकार्ड तयार केले होते. सुरुवातीला साध्या ओळखीपासून सुरू झालेला संवाद हळूहळू मैत्रीत आणि त्यानंतर प्रेमसंबंधांत बदलला.काही महिन्यांतच आरोपीने तरुणीवर विश्वास संपादन करत तिच्यासमोर लग्नाचा प्रस्ताव ठेवला. त्याचवेळी त्याने तरुणीच्या आई-वडील व नातेवाइकांशीही संपर्क साधत स्वतःबद्दल विविध खोटी माहिती दिली. आरोपीच्या बोलण्यावर विश्वास ठेवून तरुणीच्या कुटुंबीयांनीही विवाहाबाबत सकारात्मक भूमिका घेतली होती. परिणामी दोन्ही कुटुंबीयांमध्ये लग्नाच्या तयारीची चर्चा सुरू झाली होती.
पहिल्या पत्नीचा फोन; संशयाची पाल चुकचुकली
दरम्यान, काही दिवसांपूर्वी तरुणीच्या आईला पुण्यातून एका अज्ञात महिलेचे वारंवार फोन येऊ लागले. त्या महिलेने सांगितले की संबंधित व्यक्ती विवाहित असून तो हिंदू नसून मुस्लिम आहे. त्याच्यापासून तिला दोन अपत्येही असल्याची माहिती तिने दिली
. या फोनमुळे तरुणीच्या कुटुंबीयांना संशय आला.यानंतर तरुणीच्या चुलत्याने आरोपीने सांगितलेल्या पत्त्यानुसार उंबरे (ता. राहुरी) येथे जाऊन स्थानिक पोलिस पाटील व ग्रामस्थांकडे चौकशी केली. मात्र त्या नावाचे कोणतेही कुटुंब गावात राहत नसल्याचे स्पष्ट झाले. यामुळे आरोपीने दिलेली माहिती खोटी असल्याचे उघड होऊ लागले.
पुढील चौकशीत त्याने वापरलेली कागदपत्रेही बनावट असल्याचे समोर आले. फोन करणारी महिला हीच त्याची पत्नी असल्याचे आणि तिच्यासोबत त्याचा आंतरधर्मीय विवाह झाल्याची बाबही पुढे आली.
. पोलिसांचा सखोल तपास
या प्रकारानंतर तरुणीच्या कुटुंबीयांनी तातडीने नातेपुते पोलीस ठाणे येथे संपर्क साधून तक्रार दिली. सहायक पोलिस निरीक्षक विशाल वायकर यांनी या प्रकरणाचा सखोल तपास सुरू केला. पोलिसांनी तांत्रिक माहिती व कागदपत्रांची पडताळणी करत आरोपीची खरी ओळख उघडकीस आणली. त्यानंतर १० मार्च रोजी त्याला ताब्यात घेण्यात आले. पुढील दिवशी त्याला माळशिरस न्यायालयात हजर केले असता न्यायालयाने त्याला पोलिस कोठडी सुनावली.
अशी मिळविली सहानुभूती
सहानुभूती मिळवण्यासाठी खोट्या गोष्टीतरुणी व तिच्या कुटुंबीयांचा विश्वास जिंकण्यासाठी आरोपीने अनेक खोट्या गोष्टी सांगितल्या होत्या. कोरोनाच्या काळात आई-वडील वारल्याचे, भाऊ मुंबईत नोकरी करत असल्याचे, तसेच गावी सहा एकर बागायती शेती व स्वतःचे घर असल्याचे तो सांगत होता. आर्थिकदृष्ट्या सक्षम आणि कुटुंबवत्सल असल्याचा आभास निर्माण करून त्याने तरुणीच्या कुटुंबीयांची सहानुभूती मिळवली होती. याच विश्वासाच्या आधारावर विवाहाची तयारीही सुरू झाली होती. मात्र काही दिवसांतच सत्य समोर आल्यानंतर तरुणी व तिच्या वडिलांनी पोलिसांकडे धाव घेतली.
पोलिसांचा सावधगिरीचा इशारा
या घटनेच्या पार्श्वभूमीवर सहायक पोलिस निरीक्षक विशाल वायकर यांनी नागरिकांना सावध राहण्याचे आवाहन केले आहे. ग्रामीण भागातही अशा प्रकारच्या फसवणुकीच्या घटना घडत असल्याने नवीन ओळखी करताना संबंधित व्यक्तीची पार्श्वभूमी, कुटुंबीयांची माहिती आणि कागदपत्रांची पडताळणी करणे अत्यावश्यक असल्याचे त्यांनी सांगितले.
तरुण-तरुणींनी तसेच पालकांनीही अशा बाबतीत सतर्कता बाळगल्यास अशा प्रकारच्या घटनांना आळा बसू शकतो, असेही त्यांनी नमूद केले.
या घटनेमुळे ग्रामीण भागातही ओळखीच्या माध्यमातून होणाऱ्या फसवणुकीचे प्रकार वाढत असल्याचे पुन्हा एकदा स्पष्ट झाले आहे. सोशल मीडियावर किंवा वैयक्तिक ओळखीमधून संबंध प्रस्थापित करताना संबंधित व्यक्तीची खरी ओळख, कुटुंबीयांची माहिती तसेच कागदपत्रांची पडताळणी करणे अत्यंत गरजेचे असल्याचे मत पोलिसांनी व्यक्त केले आहे.
दरम्यान, या प्रकरणाचा पुढील तपास नातेपुते पोलीस ठाणे चे सहायक पोलिस निरीक्षक विशाल वायकर यांच्या मार्गदर्शनाखाली सुरू आहे.
