अकलूज नगरपरिषद हद्दीत बंदी असलेल्या प्लास्टिक पिशव्याची राजरोसपणे विक्री
अकलूज (प्रतिनिधी )केंद्र सरकारने एकल वापर प्लास्टिकच्या वस्तूंवर विक्रीसाठी संपूर्ण बंदी घातली आहे. असे असताना देखील अकलूज नगरपरिषद हद्दीत किरकोळ व्यावसायिकांसह मोठ्या दुकानदारांनी बंदीतही संधी साधत बंदी असलेल्या प्लास्टिकची सर्रास विक्री सुरू ठेवली आहे. तसेच वापर देखील मोठया प्रमाणावर होत आहे.मात्र, याकडे अकलूज नगरपरिषद च्या संबंधित विभागाचे दुर्लक्ष होत आहे.
राज्य सरकारने एकल वापराच्या प्लास्टिकवर २०१८ मध्ये बंदी आणली होती. नगरपालिका, नगरपंचायतीच्यावतीने कारवाईचा धडाकाही लावण्यात आला होता. अकलूज नगरपरिषद स्थापन झालेंनंतर सुरवातीला मोठ्या प्रमाणावर प्रमाणावर कारवाई करून प्लास्टिक जप्त केले. फेरीवाले, हॉटेल, रेस्टॉरंट, प्लास्टिक व्यावसायिक आदींवरही कारवाई करत लाखो रुपयांचा दंड वसूल करण्यात आला होता. मात्र त्यानंतर मोहीम थंडावली कारवाई थांबल्याने स्थानिक व्यावसायिकांकडून वाढती मागणी पाहता शहरात पुरवठा करणारी साखळीही व्यावसायिकांकडून उभारल्या गेली.
काही व्यापाऱ्यांनी विक्रीसाठी फेरीवाले देखील नेमले आहेत.तर काही व्यापाऱ्यांनी प्लास्टिक पिशवी चा साठा करण्यासाठी गोडाऊन केले आहे.प्लास्टिक विक्रेते यांच्यावर कारवाईसाठी शहरात पथकांची नेमणूक करण्यात आली होती. मात्र, अल्पावधीतच हे पथकही थंडावल्याने पुन्हा राजरोसपणे किरकोळ व्यावसायिकांपासून तर मोठ्या व्यावसायिकांपर्यंत बंदी असलेल्या काळ्या, गुलाबी, पांढऱ्या रंगाच्या कमी जाडीच्या प्लास्टिकच्या पिशव्याची विक्री केली जात आहे.
काही व्यावसायिकांनी या बंदीतही संधी शोधून काढत प्लास्टिक विक्रीतून मोठा नफा कमविला जात आहे. 50मायक्रोन पेक्षा कमी जाडीच्या प्लास्टिक पिशवी ला बंदी असताना देखील या पिशवी ची विक्री केली जात आहे.
पिशवी चा वापर झालेंनंतर या पिशव्या रस्त्यावर, गटारीत टाकून दिल्या जातात. त्यामुळे गटारी तुंबत आहेत. त्यामुळे पाणी पुढे न जाता रस्त्यावर येते. त्यामुळे अस्वच्छता होत आहे.
त्याचप्रमाणे शहरातील अनेक टपऱ्या मध्ये कमी जाडीच्या लहान पिशवीत भरून मावा विक्री केली जाते. मावा खाऊन झाल्यानंतर ती पिशवी रस्त्यावर टाकून दिली जाते.त्यामुळे शहराचे सौन्दर्य बिघडत चालले आहे. रस्त्यावर पडलेल्या प्लास्टिक पिशव्या उचलून नगरपरिषद ची कचरा गाडी त्या पिशव्या डम्पिंग ग्राउंड वर नेवून टाकते. त्याठिकाणी प्लास्टिक पिशव्याचा ढीग साचला आहे. काहीवेळेस हा कचरा पेटवून दिला जातो. त्यामुळे प्रदूषणात वाढ होत आहे. तसेच परिसरातील नागरिकांना देखील नाहक त्रास सहन करावा लागत आहे. त्यांचे आरोग्य धोक्यात आले आहे.याशिवाय मोकाट जनावरे देखील या ठिकाणचा कचरा सेवन करतात. त्यामुळे त्यांचेही आरोग्य धोक्यात आले आहे
. त्यामुळे यावर नियंत्रण आणण्याची गरज आहे.प्लास्टिक बंदी २०२२ नियमानुसार उत्पादक, साठेदार, पुरवठादार, विक्रेते यांनी नियमभंग केल्यास त्यांच्यावर महाराष्ट्र विघटनशील व अविघटनशील कचरा (नियंत्रण) अधिनियम २००६ च्या कलम ९ अन्वये कारवाई होते. त्यात पहिल्या गुन्ह्यासाठी ५ हजार रुपये, दुसऱ्या गुन्ह्यासाठी १० हजार त्यानंतर तीन महिन्यांपर्यंत तुरुंगवास, २५ हजार रुपयांपर्यंत दंड वसूल करण्याची तरतूद आहे
.सजावटी प्लास्टिक व थर्माकोल, मिठाईचे बॉक्स, आमंत्रण कार्ड व सिगारेट पाकिटे यांची प्लास्टिक आवरणे, प्लास्टिक कांड्यांसह, कानकोरणी, फुग्यांसाठी प्लास्टिकच्या कांड्या, प्लास्टिकचे झेंडे, कँडी कांड्या, आईस्क्रीम कांड्या, प्लेट्स, कप, ग्लासेस, कटलरी जसे काटे, चमचे चाकू, पिण्याचे स्ट्रॉ, ट्रे, ढवळण्या, १०० मायक्रॉनपेक्षा कमी जाडीचे पीव्हीसी बॅनर आदी.
या बरोबर कंपोस्टेबल प्लास्टिक, सर्व प्रकारच्या प्लास्टिक पिशव्या, डिश बाऊल, डबे यावर बंदी आहे. शहरात कारवाईसाठी प्रशासनाच्यावतीने पथक तयार करण्यात आले होते. यांच्याकडून सुरुवातीला किरकोळ व्यावसायिकांवर कारवाई करण्यात आली. मात्र, मोठे मासे काही गळाला लागले नाही.
त्यामुळे स्थानिक प्रशासनाची याकडे डोळेझाक तर होत नाही ना, असा प्रश्न नागरिकांकडून उपस्थित होत आहे.
