अकलूज येथे 21ऑक्टोबर ला विजयसिंह मोहिते पाटील क्रीडा संकुल वर मनोज जरांगे पाटील यांच्या विराट सभेचे आयोजन
अकलूज(प्रतिनिधी )मराठा आरक्षण योद्धा मनोज जरांगे पाटील हे शनिवार दि.२१ रोजी अकलूज येथील मराठा बांधवांशी संपर्क साधण्यासाठी येत असून सकल मराठा समाजाच्या वतीने त्यांच्या जय्यत स्वागताची तयारी सुरू झाली असल्याचेसकल मराठा समाज माळशिरस यांचे वतीने सांगण्यात आले.
मनोज जरांगे पाटील मंगळवारी सकाळी कोपरगाव नाशिक मार्गे मुंबईला पोहोचले असून बुधवार व गुरुवारी ते मुंबईतील प्रेसच्या गाठीभेटी घेणार आहेत.गुरुवार दुपारपासून ते पुन्हा दौरा सुरू करून मराठा बांधवांच्या गाठीभेटी घेणार आहेत.शुक्रवारी ते शिवनेरी किल्ल्यावर जाऊन शिव छत्रपतींचे दर्शन घेणार आहेत, व त्यानंतर सकाळी जुन्नर,खेड राजगुरुनगर,बारामती,फलटण, व दहिवडी येथील समाज बांधवांच्या गाठीभेटी झाल्या नंतर शनिवारी दिनांक २१ रोजी सकाळी शिखर शिंगणापूर, व १०वा.अकलूज,पुढे इंदापूर,कर्जत,मांजरसुभा करून रात्री अंतरवाली सराटी येथे पोहोचणार आहेत.
जरांगे पाटील यांच्या स्वागतासाठी अकलूजकर व एकूणच माळशिरस तालुक्यातील सकल मराठा समाज जोरदार तयारीला लागला असून त्याच्या नियोजनासाठी मंगळवारी रात्री समाजाची बैठक होऊन त्यामधे सगळ्यांवर वेगवेगळ्या जबाबदाऱ्या टाकल्या आहेत.
अंतरवली सराटी जि. जालना येथे मराठा आरक्षणासाठी उपोषण करून सरकारला मेटाकुटीला आणणाऱ्या व 14 ऑक्टोबर रोजी सुमारे दिड कोटी समुदायाच्या समोर मराठा आरक्षणाचा एल्गार पुकारणाऱ्या मराठा योद्धा मनोज जरांगे पाटील यांची जाहीर सभा शनिवारी दि. 21 ऑक्टोबर रोजी सकाळी दहा वाजता अकलूज ता. माळशिरस येथील विजयसिंह मोहिते पाटील क्रीडा संकुल येथे होणार असल्याची माहिती सकल मराठा समाजाच्या वतीने देण्यात आली.
मनोज जरांगे पाटील यांच्या सभेच्या आयोजनासाठी शासकीय विश्रामगृह अकलूज येथे माळशिरस तालुका सकल मराठा समाजाची बैठक पार पडली.
यावेळी सर्व मराठा समाज बांधवांच्या एकमताने व सर्वांना सोयीस्कर असणाऱ्या अकलूज येथील क्रीडा संकुलाची सभेसाठी सर्वांनुमते निवड करण्यात आली.
सभेच्या आयोजन प्रसंगी विविध स्तरावर समित्या नेमण्यात आलेला असून सभेसाठी लागणाऱ्या सर्व बारीसारीक साहित्यासाठी जबाबदाऱ्या देण्यात आलेल्या असून या सभेसाठी तालुक्यासह आजूबाजूच्या परिसरातून खूप मोठ्या प्रमाणात गर्दी होणार असल्याने त्यावर नियंत्रित ठेवण्यासाठी सर्व प्रकारची यंत्रणा सज्ज ठेवण्यात आलेली आहे.
सभेसाठी अत्यावश्यक सेवा, पोलीस यंत्रणा तसेच कायदेशीर सोपस्कार पार पाडण्यासाठी समित्यांची नेमणूक करण्यात आल्याची माहिती सकल मराठा समाजाच्या वतीने देण्यात आली.
सभेच्या आयोजन बैठकीसाठी माळशिरस तालुक्यातील सर्व भागातून मराठा बांधवांनी गर्दी केली होती.माळशिरस तालुक्यातील सर्व बांधवानी आपल्या कुटूंबासह मित्रमंडळ, यांना सोबत घेऊन सभेला उपस्थित राहण्याचे आवाहन सकल मराठा समाज माळशिरस यांचे वतीने करण्यात आले आहे.
