स्वातंत्र्यदिनी विविध प्रश्नांसाठी महाळुंग-श्रीपुर नगरपंचायतीसमोर वंचित बहुजन आघाडीचे लाक्षणिक आंदोलन
अकलूज, प्रतिनिधी – वंचित बहुजन आघाडी महाळुंग व श्रीपुर शहरच्या वतीने महाळुंग-श्रीपुर नगरपंचायतच्या अनागोंदी कारभाराविरोधात तिव्र स्वरूपाचे लाक्षणिक आंदोलन घेण्यात आले. यावेळी वंचितचे कार्यकर्ते बहुसंख्येने उपस्थित होते. महाळुंग-श्रीपुर नगरपंचायतमधील कारभार निव्वल भ्रष्ट झाला असुन हद्दीतील राहिवाश्यांच्या मूलभूत सुविधांचीही पूर्तता केली जात नाही. दुसरीकडे विकासाच्या नावावर भ्रष्टाचार करून जनतेचा कररुपी पैसा लाटण्याचे काम केले जात आहे. घनकचरा व्यवस्थापनाचा ठेका दिलेल्या संस्थेकडुन कर्मचाऱ्यांना किमान वेतन दिले जात नसुन त्यांची PF नोंदणीही करण्यात आलेली नाही. याबाबत ठेका रद्द करण्यासाठी दिनांक १९-०७-२०२२ रोजी निवेदन देण्यात आले होते त्यावर प्रशासनाकडून योग्य ती कारवाई झालेली नाही त्यामुळे घनकचरा व्यवस्थापनाचा ठेका दिलेल्या संस्थेची वर्क ऑर्डर रद्द करण्यासाठी विशेष सभा बोलावून मा.जिल्हाधिकारी यांना प्रस्ताव पाठविण्याची मागणी यावेळी करण्यात आली. तसेच याबाबतीत महाळुंग-श्रीपुर नगरपंचायतीचे कार्यालयीन अधिक्षक दत्तात्रय यादव यांना जाब विचारला असता त्यांचे बोलणे उर्मटपणाचे असल्याने आणि त्यांनी १३ ऑगस्ट रोजी ध्वजारोहण केलेले नसल्याने त्यांचे कामकाज कर्तव्यात कसुर करणारे व स्वभाव घमंडी, हेकेखोर असल्याने त्यांचे विरोधात नागरिकांच्या तक्रारी आम्हास प्राप्त झाल्याने त्यांना तात्काळ पदमुक्त करावे अशीही मागणी यावेळी करण्यात आली. प्रशांत कुलकर्णी यांचा राजीनामा तात्काळ मंजुर करून प्रस्ताव पुढे पाठवावा आणि नगरपंचायतवासीयांना पिण्याच्या गढूळ पाण्याचा पुरवठा होत असल्याने यावर तात्काळ कार्यवाही करावी अशी मागणी यावेळी करण्यात आली. आंदोलनस्थळी वंचितच्या सांस्कृतिक कलाकारांनी शाहिरीचा कार्यक्रम सादर करून उपस्थितांत जोश भरला. मानवतावादी कार्यकर्ते अक्षय जाधव शिक्षणाचे राष्ट्रीयकरण करण्याचा दृढ संकल्प घेऊन संपूर्ण भारतभर सायकलयात्रा करून लोकांचे अभिप्राय घेणार आहेत जेणेकरून सर्वांना मोफत शिक्षण प्राप्त व्हावे असा त्यांचा मानस आहे त्यांनाही या सामाजिक उपक्रमासाठी सर्वांच्या वतीने शुभेच्छा देण्यात आल्या. स्वातंत्र्य दिनाचे औचित्य साधत वंचितचे सूनका जाधव यांनी शरीरावर ध्वजाची प्रतिमा साकारत सर्वांचे लक्ष वेधुन घेतले. यावेळी मुख्याधिकारी यांच्या वतीने प्रशासनाने आंदोलनस्थळी भेट देत निवेदन स्वीकारून लवकरात लवकर कारवाई करण्याचे आश्वासन दिले. तात्काळ कारवाई न झाल्यास यापुढे तिव्र स्वरूपाचे आंदोलन करण्याचा ईशारा यावेळी वंचित बहुजन आघाडीच्या वतीने देण्यात आला. सदर आंदोलनास वंचित बहुजन आघाडी माळशिरस तालुक्यातील पदाधिकारी आणि महाळुंग व श्रीपुर शहरातील पदाधिकारी व कार्यकते बहुसंख्येने उपस्थित होते.
